Paunawa sa Pagkapribado 
(Privacy Notice)

Para makumpirma ang iyong pagkakakilanlan (Know-Your-Customer o KYC Information)
Bago namin magawa ang iyong digital wallet at maipagamit sa iyo ang mga serbisyo ng aming mga partner, kailangan naming malaman ang iyong pagkakakilanlan, ayon sa hinihingi ng batas. Kailangan din naming makita ang mga transaksyon at mai-report sa mga financial regulator ang anumang kaduda-dudang aktibidad. Dahil ito sa mga patakaran laban sa pagtatago ng tunay na pinagmulan ng pera na maaaring nakuha sa ilegal na paraan (money laundering).

Para maibigay ang aming mga serbisyong angkop sa istilo ng iyong pamumuhay at pinansyal na pangangailangan
Kinokolekta namin ang iyong personal na impormasyon para madali at agad mong magamit ang aming mga serbisyo. Halimbawa, kapag nagbabayad ka ng mga bill gamit ang iyong GCash App, hinihingi namin ang iyong pangalan, detalye ng iyong account, detalye kung paano ka makokontak, at paraan ng iyong pagbabayad. Kinukuha namin ang mga detalyeng ito para mailagay ng kompanya o institusyong iyong binabayaran ang bayad sa tamang bill o account.

Tinitingnan din namin ang iyong paggamit ng aming mga serbisyo para makita kung makakakuha ka ng mga espesyal na deal mula sa amin. Isa rin sa mga tinitingnan namin ay ang mga bagay tulad ng kung tama ang pag-set up ng iyong account, kung sapat ang perang nasa iyong GCash account, at kung gaano kadalas mo ginagamit ang aming mga serbisyo tulad ng pagbabayad ng mga bill, pag-invest ng pera, pag-ipon ng pera, at pagkuha ng insurance. Tinitingnan din namin kung binabayaran mo ang iyong mga loan nang maaga o nang nasa oras, at kung paano mo ginagamit ang iyong kredit. Sa pamamagitan nito, magagawa naming kalkulahin ang iyong GScore. Para malaman pa ang tungkol sa GScore, mangyaring tingnan ang GScore FAQs.

Para ma-personalize ang aming mga produkto at serbisyo
Kinokolekta at sinusuri namin ang iyong personal na impormasyon para maiangkop sa iyo ang aming mga serbisyo. Sa pag-unawa sa iyong mga gusto at kailangan, makapagrerekomenda kami ng mga mas angkop na produkto, serbisyo, at mga personalisadong feature para mas mapaganda pa ang iyong karanasan sa paggamit ng iyong GCash App.

Para makagawa ng pananaliksik sa produkto at merkado (product at market research)
Pwede naming gamitin ang iyong personal na impormasyon upang maintindihan namin ang mga uso at mga pattern sa merkado. Ito ay para na rin makagawa kami ng mga bagong produkto at mas mapaganda namin ang aming serbisyo. Halimbawa, may mga iniaalok kaming patas na pagpapautang (fair lending), mga abot-kayang pamumuhunan, accessible na insurance, at iba pang serbisyo upang maisulong ang financial inclusivity para sa lahat ng mga Pilipino. Naipakilala namin ang mga produktong ito dahil inaaral namin ang iyong mga pangangailangan.

Para mapamahalaan ang panganib at maiwasan ang posibleng panlilinlang (fraud) at krimen
Nagsasagawa kami ng pagsusuri sa panganib (risk analysis) at pagpigil ng panlilinlang (fraud prevention) para mapangalagaan ka, ang aming mga partner, at ang aming negosyo. Halimbawa, para mapigilan ang sinuman na kontrolin ang iyong GCash account, pwede naming kunin at tingnan ang iyong larawan, mga transaction history, at iba pang personal na impormasyon. Para malaman ang tungkol sa aming DoubleSafe security feature, mangyaring bisitahin ang aming website.

Para mas mapaganda ang aming customer service
Pwedeng kunin ng aming Customer Service Management Team ang iyong ibang personal na impormasyon para masagot ng tama ang iyong mga tanong. Inire-rekord din namin ang iyong mga tawag at chat para mas mapaganda pa ang aming serbisyo at maturuan ang aming team.

Para mas mapahusay ang performance ng iyong GCash App
Para masulit at makuha mo ang pinakamagandang karanasan sa paggamit ng iyong GCash App, pwede naming gamitin ang iyong personal na impormasyon at pag-aralan kung paano mo ginagamit ang app. Ito ay para mas mapaganda pa namin ang aming mga serbisyo.

Para mapadalhan ka ng mga update at ibang komunikasyon
Pwede naming gamitin ang iyong personal na impormasyon para mapadalhan ka ng mahahalagang update tungkol sa iyong account, mga serbisyong iyong ginagamit, mga bagong feature, security alert, at iba pang kaugnay na komunikasyon.

Para ma-advertise ang mga kaugnay na serbisyo at produkto
Pwede naming gamitin ang iyong personal na impormasyon para makagawa ng pasadyang ad (targeted advertising). Ito ay para maipakita sa iyo ang mga offer, promosyon, at suhestyon na tugma sa iyong mga interes. Layunin din namin na mabigyan ka ng mas personalisadong ad. Dahil dito, pinag-aaralan namin kung paano mo gamitin ang iyong GCash account, tulad ng pagsusuri ng iyong transaction history, pattern ng paggamit, at mga preperensya.

Para mapangasiwaan ang proseso ng recruitment at mapanatili ang mga rekord ng pagtratrabaho
Kung magtatrabaho ka sa amin, nakapagtrabaho sa amin, o interesadong maging bahagi ng aming kompanya, pinoproseso namin ang mga personal na impormasyon na iyong ibinahagi sa amin sa iyong resume at mga application form. Kabilang dito ang mga impormasyon tungkol sa iyong edukasyon, mga resulta ng test, alok na trabaho, background check, at pagsusuring medikal. Itinatabi rin namin ang iyong personal na impormasyon habang ikaw ay nagtatrabaho sa amin at kahit na pagkatapos mong umalis, tulad ng mga detalye kaugnay ng iyong pensyon at mga benepisyo, account sa bangko, mga tirahan, benepisyaryo, at emergency contact.

Impormasyon sa Pagkakakilanlan (Know-Your-Customer): Kapag nagbukas ka ng GCash account, kinokolekta namin ang iyong mga personal na detalye. Kasama rito ang iyong buong pangalan, kasarian, tirahan, numero ng cellphone, email address, detalye ng kapanganakan, nasyonalidad, mga numero ng ID na nagmula sa gobyerno, larawan, at pirma. Kung kailangan, pwede rin naming itanong ang tungkol sa iyong trabaho, katayuan sa pag-aasawa (marital status), kinikita, at iba pang impormasyon, ayon sa hinihingi ng mga regulasyon ng Bangko Sentral ng Pilipinas (BSP).

Itinatabi namin ang mga impormasyon ng iyong pagkakakilanlan sa loob ng 5 taon pagkatapos ng huling transaksyon na iyong ginawa gamit ang iyong GCash account o pagkatapos mong isara ang iyong account.

Pinansyal na Impormasyon: Kung ikokonekta mo ang iyong GCash digital wallet sa iyong account sa bangko, pwede naming kolektahin ang mga detalye nito pati na rin ang detalye ng iyong online login.

Itinatabi namin ang iyong pinansyal na impormasyon sa loob ng 5 taon pagkatapos ng huling transaksyon na iyong ginawa gamit ang iyong GCash account o pagkatapos mong isara ang iyong Account.

Listahan ng Kontak: Kapag ginamit mo ang aming serbisyo para magpadala ng pera o mobile load sa iyong mga kontak, o hinikayat silang gamitin ang mga feature tulad ng GForest, pwede naming kolektahin ang mga impormasyon mula sa iyong address book.

Papanatilihin ng GCash App ang iyong listahan ng kontak hangga’t mayroon ka nito.

Third-Party Information: Kinokolekta namin ang mga impormasyon tungkol sa iyo mula sa iba’t ibang mga source para pagandahin ang aming mga serbisyo. Halimbawa, para sa recruitment at background check, pagproseso ng transaksyon, beripikasyon ng pagkakakilanlan, at pag-detect sa panlilinlang.

Nag-iiba ang haba ng panahon ng pagtatago namin ng iyong third-party information:

• Impormasyon sa pagkakakilanlan: Itinatabi ang mga ito ng hanggang 5 taon pagkatapos ng huling transaksyong iyong ginawa gamit ang iyong GCash account o pagkatapos mong isara ang iyong account.
• Impormasyong propesyonal o tungkol sa trabaho: Itinatabi ang mga ito sa loob ng 5 taon pagkatapos ng iyong recruitment o sa pagtatapos ng iyong trabaho.
• Kung may kaugnayan sa patuloy na imbestigasyon: Itinatabi ang mga ito nang hanggang 10 taon pagkatapos maisagawa ang imbestigasyon o depende sa utos ng korte.

Detalye ng Device:Kinokolekta namin ang mga detalye tungkol sa device na iyong ginagamit sa pag-akses ng iyong GCash account, tulad ng uri ng device, numero ng identidad, time zone, setting ng wika, uri ng browser, at IP address.

Itinatabi namin ang mga impormasyon tungkol sa iyong device nang hindi bababa sa 90 araw sa aming aktibong rekord at hanggang 3 taon sa aming backup na rekord.

Impormasyon sa Paggamit ng App: Kinokolekta namin ang mga impormasyon tungkol sa kung paano mo gamitin ang app at website, tulad ng mga page na iyong binibisita at mga aktibidad na ginagawa mo doon.

Itinatabi namin ang iyong mga impormasyon sa paggamit ng app nang hindi bababa sa 90 araw sa aming aktibong rekord at hanggang 3 taon sa aming backup na rekord.

Biometrikong Impormasyon sa Pag-login: Kinokolekta namin ang mga biometrikong impormasyon mula sa iyong device para maakses ang iyong GCash account. Maaari rin naming kolektahin ang iyong larawan para sa aming DoubleSafe security feature. Para malaman pa ang tungkol sa DoubleSafe security feature, mangyaring bisitahin ang aming website.

Itatabi namin ang detalye ng iyong biometrikong impormasyon sa pag-login hangga’t mayroon kang GCash App.

Impormasyon sa Geolocation: Kinokolekta namin ang mga impormasyon tungkol sa iyong lokasyon para mas mapaganda pa ang aming mga serbisyo, para sa pag-detect ng panlilinlang at krimen, at para sa mga bagay na may kaugnayan sa marketing. Pwedeng hindi gumana nang maayos ang ilang feature kung hindi mo ibabahagi ang iyong lokasyon. Pwede mong kontrolin ito sa settings ng iyong device.

Kung ang impormasyon sa geolocation ay may kaugnayan sa patuloy na imbestigasyon, itatabi namin ito nang hanggang 10 taon pagkatapos maisagawa ang imbestigasyon o depende sa utos ng korte.

Mga ibinigay mong impormasyon kapag kinokontak kami: Kapag kinokontak mo kami gamit ang chat, telepono, o email, inire-rekord namin ang ating usapan at kinukuha ang mga detalye tungkol sa iyo at sa iyong mga saloobin. Bukod dito, kumukuha rin kami ng mga litrato sa mga event na iyong dinaluhan.

Kung tumutukoy ito sa mga impormasyon sa pagkakakilanlan, itatabi namin ang mga ibinigay mong impormasyon kapag kinontak mo kami sa loob ng 5 taon pagkatapos ng huling transaksyon na iyong ginawa gamit ang iyong GCash account o pagkatapos mong isara ang iyong account.

Impormasyon sa online o network activity: Kinokolekta namin ang mga impormasyon tungkol sa iyong mga interaksyon sa aming app, website, mga advertisement, mga social media page, at iba pang digital na platform.

Itinatabi namin ang mga impormasyon tungkol sa iyong device nang hindi bababa sa 90 araw sa aming aktibong rekord at hanggang sa 3 taon sa aming backup na rekord.

Social Web Information: Kinokolekta namin ang iyong mga impormasyon sa tuwing nakikipag-ugnayan ka sa amin sa pamamagitan ng aming mga official social media page (Facebook, Twitter, Tiktok, at Instagram). Kabilang sa mga kinokolekta namin ang iyong numero ng tiket, numero ng cellphone, pangalan, larawan, at iba pang impormasyong may kaugnayan sa iyong tanong.

Nag-iiba ang haba ng panahon ng pagtatago namin ng iyong impormasyon sa social web:

• Impormasyon sa pagkakakilanlan: Itinatabi ang mga ito sa loob ng 5 taon pagkatapos ng huling transaksyon na iyong ginawa gamit ang iyong GCash account o pagkatapos mong isara ang iyong account.
• Impormasyong propesyonal o tungkol sa trabaho: Itinatabi ang mga ito sa loob ng 5 taon pagkatapos ng iyong recruitment o sa pagtatapos ng iyong trabaho.
• Kung may kaugnayan sa patuloy na imbestigasyon: Itinatabi ang mga ito nang hanggang 10 taon pagkatapos maisagawa ang imbestigasyon o depende sa utos ng korte.

Mga Advertising Unique Identifier: Kinokolekta namin ang mga unique identifier tulad ng iyong iOS Identifier for Advertisers (IDFA) at Android Advertising ID (GAID) tuwing kami ay nagsasagawa ng aming mga ad. Pwede mong kontrolin kung paano mo ibabahagi ang iyong mga advertising identifier sa pamamagitan ng pagbabago nito sa settings ng iyong device.

Itinatabi namin ang iyong mga unique identifier hangga’t mayroon kang GCash App.

Impormasyong Propesyonal o tungkol sa Trabaho: Kinokolekta namin ang mga impormasyong iyong inilagay sa iyong resume para sa iyong aplikasyon sa trabaho, kabilang na ang iyong mga dating trabaho, edukasyon, detalye kung paano ka makokontak, at mga lisensyang propesyonal o mga sertipikasyon.

Itinatabi namin ang iyong mga impormasyong prospesyonal o tungkol sa trabaho sa loob ng 5 taon pagkatapos mong umalis. Kapag hindi mo natapos ang proseso para sa iyong “clearance”, pwede naming itabi ang iyong rekord nang hanggang 7 taon.

Mga Direktang Interaksyon: Kinokolekta namin ang iyong impormasyon kapag gumagawa ka ng GCash account at nagbibigay ng mga personal na impormasyon para magamit ang aming mga serbisyo, mag-apply sa trabaho, sumali sa mga recruitment event, makipag-ugnayan sa amin para humingi tulong, at iba pa.

Sa Pamamagitan ng aming App at Website: Kinokolekta namin ang iyong mga impormasyon kapag nagbukas ka ng GCash account o gumamit ng alinman sa aming mga serbisyo tulad ng GStocks PH, Global Stocks, o GCrypto, o kapag nag apply ka para maging isa sa aming mga merchant o business partner.

Sa Pamamagitan ng Iba’t ibang Channel: Kinokolekta namin ang iyong mga impormasyon sa pamamagitan ng iba’t ibang channel, kabilang na ang mga online form at mga app page na hawak namin o ng aming mga service provider. Halimbawa, kapag bumili ka ng produkto mula sa website ng aming partner at pinili ang GCash bilang paraan ng pagbabayad, kokolektahin namin ang iyong impormasyon para maproseso ang iyong bayad.

Mula sa Aming mga Partner at mga Affiliate: Halimbawa, pwede naming matanggap ang iyong personal na impormasyon mula sa human resources department ng iyong kompanya kapag ginagamit nila ang GCash para bayaran ang iyong sweldo. Nakukuha rin namin ang mga impormasyon mula sa ibang mga kompanya kapag ginagamit nila ang GCash sa pag-aalok sa iyo ng kanilang mga serbisyo.

Mula sa Aming mga Social Media Platform: Kinokolekta namin ang iyong mga impormasyon tuwing pakikipag interaksyon ka sa amin sa aming mga opisyal na social media page o kapag sumali ka sa aming mga contest.

Sa Pagbibigay ng Permiso sa Iyong mga Mobile Device: Kinokolekta namin ang iyong mga impormasyon kapag ginamit mo ang iyong biometrikong impormasyon sa pag-login o binigyan ng akses ang piling serbisyo tulad ng GForest at iba pang aktibidad sa marketing.

Mula sa Ibang Third Party: Halimbawa, pwede naming makuha ang iyong personal na impormasyon kapag pinahintulutan mo ang ibang kumpanya na makipag transaksyon sa amin o kapag hiniling mong ipadala nila ang iyong personal na impormasyon sa amin (pagtupad sa iyong karapatan sa data portability).

Mula sa Iyong mga Kaibigan, Miyembro ng Pamilya, o Dating Pinagtatrabahuhan: Halimbawa, kinokolekta namin ang mga impormasyon kapag inilista ka ng iyong mga kaibigan bilang reference o contact person sa kanilang account.

Mula sa mga Third-Party Recruitment Agency: Pwedeng magbigay ang mga ka-partner naming mga recruitment agency ng kopya ng iyong resume o mga personal na impormasyong iyong ibinahagi sa iyong job-search at mga professional networking website.

Mula sa mga Third-Party Background Verification Provider: Kumukuha kami ng mga taong nag beberipika ng mga impormasyong ibinibigay mo sa iyong aplikasyon sa trabaho at nagsasagawa ng background check. Nakatutulong ito sa amin para malaman kung ikaw ay nababagay sa aming kompanya.

Mga GCash affiliate: Nagtutulungan ang iba’t ibang kompanyang katuwang ng GCash para makapagbigay ng serbisyong angkop sa istilo ng iyong pamumuhay at pangangailangang pinansyal. Halimbawa, kung magdesisyon kang mag-apply ng loan, ang mga ibibigay mong personal na impormasyon ay pwede naming ibahagi sa aming lending partner, Fuse Lending, Inc. (FLI). G-Xchange Inc. (GXI) ang pangunahing kompanyang nagpapatakbo sa GCash. May mga katuwang na kompanya ang GXI tulad ng FLI at BlockG Virtual Assets, Inc. (BlockG). Ang kompanyang Globe Fintech Innovations, Inc. (GFI or Mynt) naman ang nagmamay-ari sa GXI.

Mga pinansyal na institusyon at mga credit investigation agency: Para patuloy kang mabigyan ng mga dekalidad na serbisyo, pwede naming ibahagi ang iyong mga personal na impormasyon sa iba pang mga pinagkakatiwalaang pinansyal na institusyon. Nakatutulong ito sa amin para maibigay ang mga serbisyong iyong hiniling, makumpirma ang iyong pagkakakilanlan, suriin ang kakayahan mong magbayad, mapamahalaan ang mga panganib, maiwasan ang panlilinlang at krimen, at marami pang iba.

Mga partner: Pwedeng makipag tulungan ang GCash sa iba’t ibang negosyo para makapagbigay sa iyo ng malawak na hanay ng mga serbisyong angkop sa istilo ng iyong pamumuhay at pangangailangang pinansyal. Halimbawa, kapag ginamit mo ang iyong GCash App para magbayad ng mga bill, pwede naming ibahagi ang iyong personal na impormasyon sa pinili mong billing company. Kapag sumali ka sa promosyon ng aming mga partner, pwede naming ibahagi sa kanila ang rekord ng iyong subskripsyon sa promo at redemsyon nito. Para malaman kung sino ang aming mga partner, mangyaring puntahan ang aming Website.

Mga service provider: Ibinabahagi rin namin ang iyong personal na impormasyon sa mga pinagkakatiwalaang service provider na tumutulong sa amin para gawing maayos at episyente ang aming mga serbisyo. Tinutulungan nila kami sa iba’t ibang paraan, tulad ng pagsagot sa iyong mga tanong, pagsusuri sa mga impormasyon, pangangasiwa sa mga panganib, pag-iwas sa panlilinlang, pagproseso sa mga bayad at marami pang iba. Malaki ang kanilang ginagampanan para masiguro na magamit mo nang maayos ang GCash App.

Mga katuwang sa pagpigil ng panlilinlang at krimen: Tapat kami sa tungkuling mapangalagaan ka at ang ibang mga GCash user mula sa panlilinlang at iba pang krimen. Sa pagbabahagi ng ilan sa iyong personal na impormasyon, nakakatulong kami sa isang mas ligtas at mas bukas na sistemang pinansyal para mapangalagaan ka at ang mas malawak na komunidad.

Mga ahensyang nagpapatupad ng batas, mga sangay na responsable sa mga regulasyon, at mga korte: Pwedeng ibahagi ng GCash ang iyong personal na impormasyon sa mga ahensyang nagpapatupad ng batas, sangay na responsable sa mga regulasyon, korte, at iba pang pampublikong awtoridad. Gagawin lamang namin ito kung kinakailangan ng batas o para mapangalagaan ang ating karapatan, maiwasan ang panlilinlang, at matiyak ang kaligtasan ng mga gumagamit ng GCash at ang Publiko.

Mga pagbabago sa GCash: Kapag nakipagsanib-pwersa ang GCash sa ibang kompanya, o kung bibilhin kami o ang aming mga ari-arian ng ibang kompanya, pwedeng ibahagi namin ang iyong personal na impormasyon sa nasabing kompanya. Kung mangyayari ito, sisiguraduhin naming maaga ka naming masasabihan kung ang iyong impormasyon ay ibibigay sa ibang kompanya o kung may mga bagong patakaran sa pangangalaga at pagsasapribado ng iyong mga impormasyon.